Hadar Corporate Finance etablert med Gründerpakke frå Tegneren

Hadar Corporate Finance (HCF) finn du i kontorfellesskapet Millennium Cowork på Hareid. Her har dei nyleg etablert seg - midt i det maritime senteret på Sunnmøre og med korte vegar ut i verda. Selskapet yter finansiell rådgiving av høg kvalitet og har kundar i sektorane maritim, fiskeri, akvakultur og anna industri. Teamet har brei efaring frå transaksjonsrådgiving, verdisetting, revisjon og leiande økonomifunksjonar.

Gründerpakken til HCF inneheld logo, font, fargar og oppsett på visittkort. Logoen er sett saman av ikon og namnetrekk. Ikonet er eit moderne monogram der C og F er implementert i ein H. Uttrykket er reint og stramt, men likevel vennleg. Monogrammet dannar ei lett gjenkjenneleg form som kan gi fleire assosiasjoner ut over dei reint tekstlege. Symbolet rommar ein snuoperasjon, der C blir reist opp i ein F. C og F dannar også eit tydeleg +. Eit hjarte eller anker syner pasjonen folka i HCF har for faget. Ein riddar til hest skjuler seg også i den enkle forma. Riddaren speglar sentrale verdiar i selskapet; respekt og lojalitet.

Vi takkar Karl Eirik og Pål-Andreas for oppdraget og ynskjer til lukke med etableringa!